„საქკაბელისა“ და “საქართველოს ტექნიკური უნივერსიტეტის” პარტნიორობის ფარგლებში, ენერგეტიკის ფაკულტეტის სტუდენტებთან სამუშაო შეხვედრა გაიმართა. შეხვედრის მიზანს სტუდენტების კარიერული ორიენტაციის მხარდაჭერა და მათი პროფესიული უნარების განვითარების ხელშეწყობა წარმოადგენდა.
შეხვედრის მონაწილეებმა დეტალური ინფორმაცია მიიღეს „საქკაბელის“ საქმიანობის შესახებ, გაეცნენ ენერგეტიკის სფეროში მიმდინარე ტენდენციებსა და ინდუსტრიის მოთხოვნებს, ასევე დასაქმების შესაძლებლობებს. ღონისძიება ინტერაქტიულ რეჟიმში წარიმართა და მოიცავდა დისკუსიას, რომლის ფარგლებშიც სტუდენტებმა დასვეს კითხვები და მიიღეს პრაქტიკული რეკომენდაციები.
„ჩვენთვის მნიშვნელოვანია, რომ სტუდენტებს ჯერ კიდევ სწავლის პროცესში ჰქონდეთ უშუალო კავშირი რეალურ ინდუსტრიასთან – იცნობდნენ მიმდინარე ტენდენციებს, მოთხოვნებს და იმ უნარებს, რომლებიც წარმატებისთვის აუცილებელია. მსგავსი შეხვედრები გვაძლევს შესაძლებლობას, გავუზიაროთ პრაქტიკული გამოცდილება და დავეხმაროთ მათ გააზრებული პროფესიული გზის არჩევაში,“ – „საქკაბელის“ მმართველი დირექტორი, დავით კაპანაძე.
„ენერგეტიკის სფერო მუდმივად ვითარდება და დღეს განსაკუთრებით მნიშვნელოვანია, რომ სტუდენტებმა სწავლის პროცესშივე მიიღონ ინფორმაცია ინდუსტრიაში არსებული ტენდენციების, ტექნოლოგიური სიახლეებისა და დასაქმების შესაძლებლობების შესახებ. სწორედ ასეთი შეხვედრები აძლიერებს უნივერსიტეტსა და ბიზნესს შორის კავშირს და სტუდენტებს აძლევს რეალურ წარმოდგენას მათი მომავალი პროფესიის შესახებ“. – პროფესორი ქეთევან ქუთათელაძე.
„ჩვენი მიზანია სტუდენტებს შევუქმნათ შესაძლებლობა, რომ სწავლის პერიოდში მაქსიმალურად ახლოს იყვნენ რეალურ სამუშაო გარემოსთან. ასეთი შეხვედრები არა მხოლოდ ცოდნის გაღრმავებას, არამედ პროფესიული ორიენტაციის ჩამოყალიბებასაც უწყობს ხელს. კერძო სექტორთან აქტიური თანამშრომლობა სტუდენტებს ეხმარება უკეთ დაინახონ საკუთარი შესაძლებლობები და მომავალი კარიერული განვითარების გზები“.– ასოცირებული პროფესორი ნატო ქათამაძე.