საქართველოს საკაბელო ინდუსტრიის ლიდერი მწარმოებლის, „საქკაბელის“ ხუთმა პროდუქტმა – NAYY, NYY, H05VV-F, CYKYLO-U და H05VVH2-F – ჩეხეთის რესპუბლიკაში სტანდარტებთან შესაბამისობის სერტიფიცირების პროცესი წარმატებით გაიარა და შესაბამისობის სერტიფიკატები მოიპოვა.
პროდუქციის ტესტირება და შეფასება ჩეხეთის ელექტროტექნიკური ტესტირების ინსტიტუტმა, EZÚ-მ, ჩაატარა. სერტიფიცირების პროცესის ფარგლებში დეტალურად შემოწმდა კაბელების ელექტრული და ფიზიკური მახასიათებლები, კონსტრუქციული პარამეტრები, შემადგენელი კომპონენტები, ზომები და მარკირება; ასევე, წვისა და ცეცხლის გავრცელებასთან დაკავშირებული მაჩვენებლები. ტესტირების შედეგად ხუთივე ტიპის კაბელმა სრულად დააკმაყოფილა შესაბამისი სტანდარტების მოთხოვნები, რის საფუძველზეც „საქკაბელს“ შესაბამისობის სერტიფიკატები მიენიჭა.
საერთაშორისო სერტიფიცირება და პროდუქციის შესაბამისობის პერიოდული დადასტურება „საქკაბელის“ ხარისხის მართვისა და კონტროლის უწყვეტი პროცესის მნიშვნელოვანი ნაწილია. კომპანია რეგულარულად ახორციელებს პროდუქციის ტესტირებასა და სერტიფიცირებას, რათა წარმოებული კაბელები სხვადასხვა ბაზრის ტექნიკურ და ხარისხობრივ მოთხოვნებს შეესაბამებოდეს.
აღნიშნული პროცესი განსაკუთრებით მნიშვნელოვანია კომპანიის საერთაშორისო განვითარების ფონზე. „საქკაბელის“ პროდუქცია დღეს სამ კონტინენტზე ექსპორტირდება, ხოლო საერთაშორისო სერტიფიცირება კომპანიას შესაძლებლობას აძლევს, კიდევ უფრო გააძლიეროს პოზიციები არსებულ ბაზრებზე და შექმნას საფუძველი ახალი საექსპორტო მიმართულებების განვითარებისთვის.
„საქკაბელი“ ხარისხის კონტროლისა და საერთაშორისო სტანდარტებთან შესაბამისობის მიმართულებით მუშაობას მომავალშიც განაგრძობს, რაც კომპანიის მიზანს – მომხმარებლისთვის სანდო, უსაფრთხო და სტაბილური ხარისხის საკაბელო პროდუქციის მიწოდებას ემსახურება.