„საქკაბელის“ შვილობილმა კომპანია „ევრომონტაჟმა“ ახალი კატეგორიის პროდუქტის, UV მედეგი გოფრირებული მილების წარმოება დაიწყო. ახალი პროდუქტის დამატება „ევრომონტაჟის“ საწარმოო შესაძლებლობების განვითარების მნიშვნელოვანი ეტაპია და ელექტროსამონტაჟო და სამშენებლო პროდუქტების მიმართულებით კომპანიის პორტფელის გაფართოებას ემსახურება.
UV მედეგი გოფრირებული მილები განკუთვნილია იმ ელექტროსამონტაჟო სამუშაოებისთვის, სადაც მილი ხანგრძლივი პერიოდის განმავლობაში მზის პირდაპირი ან არაპირდაპირი ულტრაიისფერი გამოსხივების ზემოქმედების ქვეშ შეიძლება აღმოჩნდეს. მათი გამოყენება განსაკუთრებით მნიშვნელოვანია გარე ელექტროინსტალაციებში, მათ შორის შენობების ფასადებზე, სახურავებზე, მზის ენერგიის სისტემებში, სამშენებლო და ინფრასტრუქტურულ ობიექტებზე.
UV გამოსხივების ხანგრძლივმა ზემოქმედებამ ჩვეულებრივ პლასტმასის მასალებზე დროთა განმავლობაში შესაძლოა გამოიწვიოს მასალის სტრუქტურული და ვიზუალური ცვლილებები. UV მედეგი გოფრირებული მილების გამოყენება კი ხელს უწყობს პროდუქტის ფუნქციური თვისებების შენარჩუნებას ხანგრძლივი ექსპლუატაციის პირობებში და უზრუნველყოფს მათში მოთავსებული კაბელების დამატებით დაცვას.
„ევრომონტაჟი“ ახალ პროდუქტს ოთხ სხვადასხვა ზომაში: 16 მმ, 20 მმ, 25 მმ და 32 მმ აწარმოებს. პოლითილენისგან დამზადებული გოფრირებული მილები საერთაშორისო სტანდარტების მოთხოვნების შესაბამისად იწარმოება, რასაც ჩეხეთის ელექტროტექნიკური ტესტირების ინსტიტუტის (EZÚ) მიერ გაცემული შესაბამისობის სერტიფიკატი ადასტურებს.
პროდუქტის UV გამოსხივების მიმართ მედეგობა შეფასდა EZÚ-ის მიერ ჩატარებული ტესტირების ფარგლებში, ხელოვნური კლიმატური ზემოქმედების პირობებში, ČSN EN ISO 4892-2:2013 + A1:2022 სტანდარტის შესაბამისად.
საკუთარი საწარმოო შესაძლებლობების განვითარებით, „ევრომონტაჟი“ „საქკაბელის ჯგუფის“ საქმიანობის სფეროს საკაბელო წარმოების მიღმა აფართოებს და ელექტროინსტალაციისა და სამშენებლო პროდუქტების მიმართულებით საკუთარ საწარმოო პორტფელს ავითარებს.
ამ ეტაპზე „ევრომონტაჟი“ მომხმარებელს პოლიეთილენის, პოლიპროპილენისა და UV მედეგ გოფრირებულ მილებს სთავაზობს. კომპანია გეგმავს, მომავალში ეტაპობრივად გააფართოოს საკუთარი წარმოების პორტფელი და ახალი ელექტროსამონტაჟო და სამშენებლო პროდუქტის კატეგორიები დაამატოს.
ახალი UV მედეგი გოფრირებული მილები მომხმარებლებისთვის უკვე ხელმისაწვდომია „საქკაბელის“ მაღაზიათა ქსელში: https://shorturl.at/muE3C