„საქკაბელის“ მხარდაჭერით ბათუმში უძრავი ქონების ყოველწლიური კონფერენცია GREMO 2026 გაიმართა. უკვე მეშვიდედ, ღონისძიებამ დეველოპერები, ინვესტორები და ინდუსტრიის წამყვანი ექსპერტები საქართველოს უძრავი ქონების ბაზრის განვითარების სტრატეგიული მიმართულებების განსახილველად გააერთიანა.
კონფერენციის ფარგლებში დარგობრივი პანელური დისკუსია თემით „კონცეფციიდან ექსპლუატაციამდე – როგორ იქმნება პრემიუმ კურორტი“ შედგა. “საქკაბელის” მმართველმა დირექტორმა, დავით კაპანაძემ, დისკუსიის ფარგლებში თანამედროვე დეველოპერულ პროექტებში ხარისხიანი ელექტროინფრასტრუქტურისა და უსაფრთხოების სტანდარტების მნიშვნელობაზე ისაუბრა და ის გამოწვევები მიმოიხილა, რომელიც სწრაფად მზარდ უძრავი ქონების ბაზარს ახლავს თან.
„დღეს უძრავი ქონების სექტორში კონკურენტუნარიანობა მხოლოდ არქიტექტურითა და დახვეწილი დიზაინით აღარ განისაზღვრება – კრიტიკულად მნიშვნელოვანია შენობის საინჟინრო უსაფრთხოება, ენერგოეფექტურობა და გამოყენებული მასალების ხარისხი. თანამედროვე პროექტები საჭიროებენ ისეთ ელექტროინფრასტრუქტურას, რომელიც არა მხოლოდ ტექნიკურ მოთხოვნებს აკმაყოფილებს, არამედ ადამიანების უსაფრთხოებასა და შენობების გრძელვადიან მდგრადობას უზრუნველყოფს. სწორედ ამიტომ, ჩვენთვის მნიშვნელოვანია დეველოპერულ სექტორთან მუდმივი თანამშრომლობა და საერთაშორისო სტანდარტების შესაბამისი პროდუქციის მიწოდება,“ – „საქკაბელის“ მმართველი დირექტორი, დავით კაპანაძე.
შეგახსენებთ, „საქკაბელი“ 67-ე წელია ადგილობრივ ბაზარზე სფეროს ლიდერის პოზიციას იკავებს და მომხმარებელს, როგორც საკაბელო, ისე ელექტრიფიკაციასთან დაკავშირებულ სხვა 5000-მდე დასახელების პროდუქტს სთავაზობს. დღესდღეობით „საქკაბელის“ მიერ წარმოებული პროდუქციის ექსპორტი ევროკავშირის წევრ ქყევნებში, ახლო აღმოსავლეთში და სამხრეთ ამერიკის კონტინენტზე ხორციელდება. აღსანიშნავია, რომ “საქკაბელის” პროდუქცია, მომხმარებელთან გაგზავნამდე, დეტალურ შემოწმებას ქარხანაში მოქმედ, ხარისხის კონტროლის აკრედიტებულ ლაბორატორიაში გადის.