“საქკაბელსა” და “საქართველოს ტექნიკურ უნივერსიტეტს” შორის სტრატეგიული პარტნიორობა განახლდა. შესაბამის დოკუმენტს ხელი “საქკაბელის” მმართველმა დირექტორმა დავით კაპანაძემ და “საქართველოს ტექნიკური უნივერსიტეტის” ვიცე-რექტორმა, პროფესორმა თამარ წერეთელმა მოაწერეს.
მემორანდუმი სტუდენტთა სტაჟირების, დასაქმებისა და პროფესიული უნარების განვითარების ხელშეწყობას ისახავს მიზნად. აღსანიშნავია, რომ განათლების ხელმისაწვდომობის გაზრდისა და ნიჭიერი ახალგაზრდების წახალისების მიზნით, განახლებული პარტნიორობის ფარგლებში „საქკაბელი“ სტიპენდიას დააწესებს.
“განათლების მხარდაჭერა “საქკაბელისთვის“ ერთ-ერთ სტრატეგიულ მიმართულებას წარმოადგენს. „საქკაბელსა“ და „საქართველოს ტექნიკურ უნივერსიტეტს“ შორის წარმატებული პარტნიორობის ფარგლებში უკვე არაერთ სტუდენტს მიეცა შესაძლებლობა, რეალურ გარემოში განევითარებინა პროფესიული უნარები, მიეღო პრაქტიკული გამოცდილება და დასაქმებულიყო „საქკაბელის“ საწარმოში. განახლებული თანამშრომლობის ფარგლებში „საქართველოს ტექნიკური უნივერსიტეტის“ წარჩინებული სტუდენტებისთვის ამიერიდან „საქკაბელის“ სახელობის სტიპენდია დაწესდება. მოხარული ვართ, რომ გვეძლევა შესაძლებლობა, მხარი დავუჭიროთ ნიჭიერი ახალგაზრდების განათლების, პროფესიული უნარებისა და კარიერული განვითარების ხელშეწყობას. გვჯერა, თანამშრომლობის ფარგლებში არაერთი ახალგაზრდა იქცევა კვალიფიციურ პროფესიონალად და საკუთარი საქმიანობით შეიტანს წვლილს ჩვენი ქვეყნის განვითარებაში“, – “საქკაბელის” მმართველი დირექტორი, დავით კაპანაძე.
„საქართველოს ტექნიკური უნივერსიტეტისთვის უმთავრესი პრიორიტეტი შრომის ბაზარზე კურსდამთავრებულთა კონკურენტუნარიანობის ზრდაა. „საქკაბელი“ ჩვენს ქვეყანაში ერთ-ერთი ლიდერი კომპანიაა და მასთან თანამშრომლობა სტუდენტებს უნიკალურ შესაძლებლობას მისცემს. მემორანდუმის ფარგლებში ახალგაზრდები შეძლებენ საწარმოო პრაქტიკის გავლას უშუალოდ ქარხანაში, გაეცნობიან თანამედროვე ტექნოლოგიურ პროცესებს და რაც მთავარია, წარმატებულ სტუდენტებს ექნებათ რეალური დასაქმების პერსპექტივა. საინჟინრო განათლება წარმოუდგენელია მძლავრი პრაქტიკული ბაზის გარეშე – „საქკაბელი“ კი სწორედ ის პარტნიორია, რომელსაც შეუძლია სასწავლო პროცესი რეალური ინდუსტრიული გამოცდილებით გაამდიდროს. ერთობლივი ძალისხმევით შევძლებთ მოვამზადოთ მაღალკვალიფიციური ინჟინრები და ტექნოლოგები, რომლებიც არა მხოლოდ დააკმაყოფილებენ ადგილობრივი ბაზრის მოთხოვნებს, არამედ წვლილს შეიტანენ ქვეყნის ეკონომიკურ განვითარებაში“, – “საქართველოს ტექნიკური უნივერსიტეტის” ვიცე-რექტორი, პროფესორი თამარ წერეთელი.