„საქკაბელსა“ და „ბათუმის ნავთობტერმინალს“ შორის თანამშრომლობის მემორანდუმი გაფორმდა

„საქკაბელი“ და „ბათუმის ნავთობტერმინალი“ სტრატეგიულ პარტნიორობას იწყებენ. თანამშრომლობის მემორანდუმს ხელი „საქკაბელის“ მმართველმა დირექტორმა დავით კაპანაძემ და “ბათუმის ნავთობტერმინალის” მომარაგებისა და შესყიდვების დირექტორმა ბეკზატ კალიევმა მოაწერეს. პარტნიორობის ფარგლებში „საქკაბელი“ “ბათუმის ნავთობტერმინალს” სხვადასხვა ინფრასტრუქტურული პროექტების განხორციელებისათვის საჭირო საკაბელო პროდუქციით უზრუნველყოფს.

1883 წლიდან, “ბათუმის ნავთობტერმინალი” საქართველოსთვის ერთ-ერთ სტრატეგიულ ობიექტს წარმოადგენს, რომელიც აძლიერებს საქართველოს, როგორც სატრანზიტო ჰაბის პოზიციას გლობალურ ბაზარზე. ტერმინალი ნავთობისა და ნავთობპროდუქტების გადაზიდვასა და შენახვას ისეთი ქვეყნებიდან უზრუნველყოფს, როგორიცაა: საქართველო, ყაზახეთი, აზერბაიჯანი და თურქმენეთი.

„საქკაბელი“, როგორც საქართველოს საკაბელო ინდუსტრიის ლიდერი კომპანია, მხარს დაუჭერს „ბათუმის ნავთობტერმინალს“ კრიტიკული ინფრასტრუქტურის კომპონენტების მიწოდებასა და ახალი ინიციატივების განხორციელებაში.

„მოხარული ვართ, რომ წარმატებით დავასრულეთ მოლაპარაკების პროცესი და “ბათუმის ნავთობტერმინალთან” პარტნიორობით შესაძლებლობა გვეძლევა მხარი დავუჭიროთ ქვეყნისთვის სტრატეგიული მნიშვნელობის ინიციატივებს. ეს თანამშრომლობა კიდევ ერთხელ უსვამს ხაზს ჩვენს მისიას – საქართველოში წარმოებული, საერთაშორისო სტანდარტის საკაბელო პროდუქციით, მხარი დავუჭიროთ მცირე თუ მასშტაბურ პროექტებს და წვლილი შევიტანოთ ქვეყნის ინფრასტრუქტურულ და ეკონომიკურ განვითარებაში. გვჯერა, აღნიშნული პარტნიორობა ხელს შეუწყობს როგორც ადგილობრივი წარმოების გაძლიერებას, ასევე საქართველოს, როგორც რეგიონული ლოგისტიკური ჰაბის პოზიციონირებას“, – „საქკაბელის“ მმართველი დირექტორი, დავით კაპანაძე.

„საქკაბელის“ შესახებ

„საქკაბელი“ 67-ე წელია ადგილობრივ ბაზარზე სფეროს ლიდერის პოზიციას იკავებს და მომხმარებელს როგორც საკაბელო, ისე ელექტროფიკაციასთან დაკავშირებულ სხვა 2000-მდე დასახელების პროდუქტს სთავაზობს. კომპანია ქვეყნის მასშტაბით რვა შოურუმს, სამ სასაწყობე სივრცეს, სადილერო და სადისტრიბუციო ქსელებს აერთიანებს. “საქკაბელის” პროდუქცია, მომხმარებელთან გაგზავნამდე, დეტალურ შემოწმებას ქარხანაში მოქმედ, ხარისხის კონტროლის აკრედიტებულ ლაბორატორიაში გადის.

„ბათუმის ნავთობტერმინალის“ შესახებ

“ბათუმის ნავთობტერმინალის” ისტორია მე-19 საუკუნიდან იწყება და ის მჭიდრო კავშირშია კასპიის ნავთობის ინდუსტრიის განვითარების ისტორიულ მოვლენებთან. ობიექტის ისტორია და გეოგრაფიული მდებარეობა განაპირობებს ტერმინალის მნიშვნელოვან როლს ევრაზიული ენერგეტიკული ლოგისტიკის ქსელში. „ბათუმის ნავთობტერმინალი“ დღეისათვის 81 ჰა. ტერიტორიაზე ხუთ სარეზერვუარო პარკს და ნავთომჩამოსასხმელ კომპლექსს აერთიანებს.