“საქკაბელის“ პროდუქციას ევროპული ავტორიტეტული მასერტიფიცირებელი ორგანოს, TÜV Austria-ს მიერ საერთაშორისო სერტიფიკატი მიენიჭა, რომელიც მაღალი ხარისხისა და უსაფრთხოების სტანდარტებთან შესაბამისობის საფუძველზე გაიცა. სერტიფიკატი „საქკაბელის“ წარმოების ძალოვან NAYY კაბელს მიენიჭა, რომელიც ფართოდ გამოიყენება ელექტროენერგიის გადასაცემად და გასანაწილებლად როგორც სამრეწველო, ისე კომერციულ და ინფრასტრუქტურულ პროექტებში.
ლაბორატორიული ტესტირებისა და ტექნიკური შეფასების საფუძველზე, TÜV Austria-მ დაადასტურა, რომ „საქკაბელის“ მიერ წარმოებული NAYY კაბელი სრულად შეესაბამება IEC 60502-1:2021 სტანდარტის მოთხოვნებს. აღნიშნული სტანდარტი განსაზღვრავს მუშაობისა და უსაფრთხოების კრიტერიუმებს ექსტრუდირებული იზოლაციის მქონე, 1 კილოვოლტამდე ნომინალური ძაბვის კაბელებისთვის.
სერტიფიცირების ფარგლებში კაბელის კრიტიკული პარამეტრები შეფასდა, მათ შორის: დენგამტარის ელექტრული წინაღობა, საიზოლაციო მასალის ელექტრული და მექანიკური თვისებები და სხვ. ტესტირებამ დაადასტურა, რომ „საქკაბლის“ მიერ წარმოებული NAYY კაბელი სრულ თანხვედრაშია დაბალი ძაბვის საკაბელო პროდუქციისთვის ევროკავშირის მიერ დადგენილ დირექტივასთან.
„დამოუკიდებელი მასერტიფიცირებელი ორგანოს, TÜV Austria-ს მიერ მონიჭებული შესაბამისობის სერტიფიკატი კიდევ უფრო აძლიერებს „საქკაბელის“, როგორც გლობალური საკაბელო ინდუსტრიის მნიშვნელოვანი მოთამაშის როლს. „საქკაბელის“ საერთაშორისო ხარისხის ქართული პროდუქცია უკვე 3 კონტინენტზე – ევროპაში, აზიასა და სამხრეთ ამერიკაში გამოიყენება. მოხარული ვართ, რომ გვეძლევა შესაძლებლობა, საქართველოში წარმოებული, უმაღლესი ხარისხის საკაბელო პროდუქციით მხარი დავუჭიროთ მრავალფეროვან პროექტებს როგორც საქართველოში, ისე საქართველოს ფარგლებს გარეთ. ინოვაციებსა და მაღალ ხარისხზე ფოკუსირებით, ჩვენ ვაგრძელებთ ადგილობრივი საკაბელო ინდუსტრიის განვითარებას და მომხმარებლისთვის საერთაშორისო სტანდარტის საკაბელო გადაწყვეტების შეთავაზებას,“ –„საქკაბელის“ მმართველი დირექტორი, დავით კაპანაძე.
შეგახსენებთ, „საქკაბელი“ 67-ე წელია იკავებს ადგილობრივ ბაზარზე სფეროს ლიდერის პოზიციას და მომხმარებელს, როგორც საკაბელო, ისე ელექტრიფიკაციასთან დაკავშირებულ სხვა 2000-მდე დასახელების პროდუქტს სთავაზობს. კომპანიის ერთ-ერთი პრიორიტეტული მიმართულება ქართულ ეკონომიკაში იმპორტის ჩანაცვლება და საექსპორტო ბაზრების დივერსიფიცირებაა.