„საქკაბელმა“ მზის ენერგიის ასოციაციის წევრებისთვის სამუშაო შეხვედრა გამართა, რომლის მთავარ მიზანსაც ცოდნის გაზიარება და მწარმოებლებსა და სექტორის სხვა მონაწილეებს შორის თანამშრომლობის გაღრმავება წარმოადგენდა.
შეხვედრა „საქკაბელის“ მმართველი დირექტორის, დავით კაპანაძის, მისასალმებელი სიტყვით გაიხსნა. მან დამსწრე საზოგადოებას კომპანიის ისტორია და საწარმოო შესაძლებლობები გააცნო და ხაზი გაუსვა საქართველოს ენერგეტიკული და ინფრასტრუქტურული განვითარების პროცესში „საქკაბელის“ როლს.
ტექნიკური სესიის ფარგლებში „საქკაბელის“ საწარმოო დეპარტამენტის ხელმძღვანელმა, დავით ჩაფიჩაძემ, კომპანიის პროდუქციის ასორტიმენტზე ისაუბრა, განსაკუთრებული აქცენტი კი სოლარ კაბელებზე გაკეთდა. შეხვედრის ფარგლებში დეტალურად იქნა განხილული „საქკაბელის“ საწარმოში სოლარ კაბელების წარმოების პროცესი და პროდუქტის ტექნიკური უპირატესობები. დავით ჩაფიჩაძემ ხაზი გაუსვა სერტიფიცირებული, მაღალი ხარისხის სოლარ კაბელების გამოყენების მნიშვნელობას მზის სისტემების უსაფრთხოებისა და ეფექტიანობის უზრუნველყოფის მიზნით.
შეხვედრა დისკუსიით დასრულდა, რომლის ფარგლებშიც მონაწილეებმა მათთვის საინტერესო კითხვებზე სპიკერებისგან დეტალური პასუხები მიიღეს. გარდა ამისა, ინდუსტრიის წარმომადგენლებმა მზის ენერგიის სექტორში არსებული ტენდენციები და თანამშრომლობის შესაძლებლობები განიხილეს.
ინფორმაციისთვის: „საქკაბელი“ 2023 წლიდან აწარმოებს H1Z2Z2-K სოლარ კაბელებს, რომელიც სხვადასხვა ტიპის – საცხოვრებელი, კომერციული თუ ინდუსტრიული – მზის ენერგიის პროექტებში გამოიყენება. პროდუქცია EN 50618:2014 და IEC 62930:2017 სტანდარტებთან შესაბამისობით მზადდება და საერთაშორისო მასერტიფიცირებელი ორგანო TÜV Nord-ისა და ჩეხეთის „ელექტროტექნიკური ტესტირების ინსტიტუტის“ უსაფრთხოებისა და ხარისხის დამადასტურებელ სერტიფიკატებს ფლობს.