„საქკაბელსა“ და „საქართველოს სახანძრო პრევენციის ასოციაციას“ შორის თანამშრომლობის მემორანდუმი გაფორმდა. შესაბამის დოკუმენტს ხელი „საქკაბელის“ მმართველმა დირექტორმა, დავით კაპანაძემ და „საქართველოს სახანძრო პრევენციის ასოციაციის“ აღმასრულებელმა დირექტორმა, გიორგი ბაჯელიძემ მოაწერეს.
პარტნიორობის ფარგლებში, სახანძრო უსაფრთხოებაში ცეცხლმედეგი კაბელების როლზე ცნობიერების ამაღლების კამპანიები და პრაქტიკული სემინარები ჩატარდება, რომელიც ელექტრული გაუმართაობით გამოწვეული ხანძრების შემცირების ხელშეწყობას ისახავს მიზნად.
„უკვე წლებია, „საქკაბელი“ მომხმარებელს ცეცხლემდეგ და ჰალოგენისგან თავისუფალ კაბელებს სთავაზობს, რომლებიც ჩვენს საწარმოში, საერთაშორისო სტანდარტების სრული დაცვით იწარმოება. სტანდარტული კაბელებისგან განსხვავებით, ისინი ხანძრის შემთხვევაშიც განაგრძობენ ფუნქციონირებას, არ გამოყოფენ კვამლს და ტოქსიკურ აირებს – შესაბამისად, არ წარმოადგენენ საფრთხეს ადამიანის ჯანმრთელობისა და გარემოსთვის. მოხარული ვართ, რომ პარტნიორობის ფარგლებში გვეძლევა შესაძლებლობა, საზოგადოებაში ავამაღლოთ ცნობიერება ხანძარმედეგი საკაბელო პროდუქციის შესახებ, რაც გვჯერა, შეამცირებს არასწორად შერჩეული კაბელებით გამოწვეულ ფატალურ შემთხვევებს და ქვეყანაში გაზრდის სახანძრო უსაფრთხოებას“, – „საქკაბელის“ მმართველი დირექტორი, დავით კაპანაძე.
„შენობებში ხანძრის ერთ-ერთ წამყვან გამომწვევ მიზეზად კვლავ ელექტრო დაზიანება და გაუმართაობა რჩება – არასწორად შერჩეული კაბელი შეიძლება ხანძრის დაწყების ან გავრცელების მთავარი წყარო გახდეს. „საქკაბელთან“ პარტნიორობის ფარგლებში, ჩვენი მიზანია, სამშენებლო სექტორის წარმომადგენლებსა და ფართო საზოგადოებას მივაწოდოთ ინფორმაცია იმის შესახებ, თუ რამდენად დიდ გავლენას ახდენს კაბელის ტიპის სწორად შერჩევა და მისი შემდგომი, დადგენილი სტანდარტების შესაბამისად მონტაჟი ჩვენს უსაფრთხოებაზე. აღნიშნული თანამშრომლობა წარმოადგენს წინ გადადგმულ ნაბიჯს სახანძრო პრევენციის თანამედროვე სტანდარტების დანერგვის გზაზე“ – „საქართველოს სახანძრო პრევენციის ასოციაციის“ აღმასრულებელი დირექტორი, გიორგი ბაჯელიძე.