საქართველოს საკაბელო ინდუსტრიის ლიდერი კომპანიის, “საქკაბელის“ პროდუქციაზე საერთაშორისო მოთხოვნა მზარდია. კომპანიამ საექსპორტო ქსელის გეოგრაფიული არეალი კვლავ გააფართოვა და ამჯერად საკუთარი პროდუქციის ექსპორტი სამხრეთ ამერიკის კონტინენტზე განახორციელა.
კომპანია „Electrimax“-თან პარტნიორობის ფარგლებში, ვენესუელაში „საქკაბელის“ მიერ წარმოებული სხვადასხვა სპეციფიკაციის სამონტაჟო და ძალოვანი კაბელების ექსპორტი შედგა.
„ვენესუელაში განხორციელებული ექსპორტი ჩვენი გლობალური საექსპორტო ქსელის განვითარების ახალ მნიშვნელოვან ეტაპს წარმოადგენს. გვეამაყება, რომ საერთაშორისო სტანდარტების შესაბამისად, „საქკაბელის“ მიერ წარმოებული პროდუქცია უკვე სამხრეთ ამერიკის კონტინენტზეც მოიხმარება. აღნიშნული საექსპორტო ტრანზაქცია კიდევ ერთი დასტურია იმ ნდობისა, რომელსაც ჩვენი საერთაშორისო პარტნიორები მსოფლიოს მასშტაბით გვიცხადებენ. „საქკაბელის“ უწყვეტი განვითარების გზაზე, ჩვენ ვაგრძელებთ როგორც ადგილობრივი, ისე საერთაშორისო პარტნიორებისა და მომხმარებლისათვის უმაღლესი ხარისხის საკაბელო გადაწყვეტების შეთავაზებას“, – „საქკაბელის“ მმართველი დირექტორი, დავით კაპანაძე.
„მოხარულები ვართ, დავიწყოთ პარტნიორობა „საქკაბელთან“ – კომპანიასთან, რომლის მაღალ ხარისხზე ორიენტირებული მიდგომა სრულ თანხვედრაშია Electrimax-ის ღირებულებებთან. ჩვენი კომპანიის ზრდის პარალელურად, ჩვენთვის მნიშვნელოვანია ვითანამშრომლოთ მწარმოებლებთან, რომლებიც აკმაყოფილებენ საერთაშორისო სტანდარტებს. სწორედ ამიტომ შევაჩერეთ არჩევანი „საქკაბელზე“. მათმა საკაბელო პროდუქციამ უკვე დაამტკიცა საიმედოობა და ეფექტიანობა და ჩვენ მზად ვართ, „საქკაბელთან“ მომდევნო წლების განმავლობაში კიდევ უფრო გავაღრმაოთ თანამშრომლობა“, – Electrimax-ის გაყიდვების მენეჯერი, გუსტავო ოსორიო.
ინფორმაციისთვის: „საქკაბელი“ საკუთარი პროდუქციის ექსპორტს 2010 წლიდან ეწევა. 2023 წლიდან, „საქკაბელის“ პროდუქცია ევროკავშირის ბაზარზე, ხოლო 2024 წლიდან, ახლო აღმოსავლეთის რეგიონში გამოჩნდა. „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს როგორც საკაბელო, ისე ელექტრიფიკაციასთან დაკავშირებულ სხვა 2000-მდე დასახელების პროდუქტს სთავაზობს. კომპანიის ერთ-ერთი პრიორიტეტული მიმართულება საექსპორტო ბაზრების დივერსიფიცირება და ქართულ ეკონომიკაში იმპორტის ჩანაცვლებაა.
