საქართველოს საკაბელო ინდუსტრიის ლიდერმა კომპანია „საქკაბელმა“ საექსპორტო არეალი კვლავ გააფართოვა და ამჯერად საკუთარი პროდუქციის ექსპორტი ყაზახეთში განახორციელა.
„საქკაბელი“ ექსპორტს 2010 წლიდან ეწევა. 2023 წელს, კომპანიის პროდუქცია ევროკავშირის წევრ ქვეყნებში, მოგვიანებით კი ახლო აღმოსავლეთში და სამხრეთ ამერიკის კონტინენტზე გამოჩნდა.
“სწრაფად განვითარებადი ინფრასტრუქტურითა და ენერგეტიკული სექტორით, ყაზახეთი ჩვენთვის ერთ-ერთ მნიშვნელოვან საექსპორტო ბაზარს წარმოადგენს და იძლევა უნიკალურ შესაძლებლობას, საერთაშორისო სტანდარტების შესაბამისად დამზადებული „საქკაბელის“ პროდუქციით შევიტანოთ წვლილი ქვეყნის განვითარებაში. მოხარული ვართ, რომ ყაზახეთის უდიდეს ქალაქში, ალმატში, ჩვენი პროდუქციის პირველი ექსპორტი წარმატებით შედგა. აღნიშნული ტრანზაქცია „საქკაბელის“ საექსპორტო სტრატეგიის ფარგლებში კიდევ ერთ მნიშვნელოვან წინ გადადგმულ ნაბიჯს წარმოადგენს, რომელიც საერთაშორისო ბაზრებზე „საქკაბელის“ პოზიციას მეტად ამყარებს“, – „საქკაბელის“ მმართველი დირექტორი, დავით კაპანაძე.
ყაზახეთისთვის განხორციელებული პირველი მიწოდება NAYY ტიპის ალუმინის ძალოვან კაბელებს მოიცავდა, რომლებიც ფართოდ გამოიყენება ელექტროენერგიის გადასაცემად და გასანაწილებლად შენობებში, ინფრასტრუქტურულ და სამრეწველო ობიექტებში.
საერთაშორისო ბაზრებზე გაფართოება „საქკაბელის“ გრძელვადიანი განვითარების სტრატეგიის ერთ-ერთ მთავარ მიმართულებას წარმოადგენს. კომპანია აგრძელებს ახალი ბაზრების ათვისებას და მიზნად ისახავს, საქართველოში წარმოებული ხარისხიანი პროდუქცია კიდევ უფრო ცნობადი გახადოს მსოფლიოს მასშტაბით.
„საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს, როგორც საკაბელო, ისე ელექტრიფიკაციასთან დაკავშირებულ 2000-მდე დასახელების პროდუქტს სთავაზობს. აღსანიშნავია, რომ “საქკაბელის” პროდუქცია, როგორც ადგილობრივ, ისე საერთაშორისო ბაზარზე, მომხმარებელთან გაგზავნამდე დეტალურ შემოწმებას ქარხანაში მოქმედ, ხარისხის კონტროლის აკრედიტებულ ლაბორატორიაში გადის.