“საქკაბელი“ საექსპორტო ქსელის გაფართოებასა და საერთაშორისო პარტნიორებთან თანამშრომლობის გაღრმავებას განაგრძობს. ამჯერად კომპანიამ ჩეხეთში რიგით მეორე საექსპორტო ტრანზაქცია განახორციელა, რასაც წინ ჩეხეთის “ელექტროტექნიკური ტესტირების ინსტიტუტის” (EZU) მიერ „საქკაბელის“ წარმოების თვითმზიდ ABC კაბელზე გაცემული ხარისხის დამადასტურებელი საერთაშორისო სერტიფიკატი უძღოდა.
საერთაშორისო სტანდარტების შესაბამისად დამზადებულ „საქკაბელის“ პროდუქციაზე მზარდი დაინტერესებიდან გამომდინარე, „საქკაბელის“ საწარმოში ჩეხი პარტნიორების ვიზიტი შედგა. სამუშაო ვიზიტის ფარგლებში მათ დეტალურად დაათვალიერეს როგორც საწარმოო პროცესი, ასევე მანქანა-დანადგარები, ხარისხის კონტროლის ლაბორატორია და გამოყენებული ნედლეული. შეხვედრის ფარგლებში საუბარი შეეხო საექსპორტო მოცულობის ზრდის პერსპექტივასა და სამომავლო თანამშრომლობის გაძლიერებას.
„მოხარული ვართ, რომ ჩეხეთში ჩვენი პროდუქციის რიგით მეორე ექსპორტი წარმატებით განხორციელდა. „საქკაბელის“, როგორც სანდო პარტნიორის პოზიცია გლობალურ ბაზარზე დღითიდღე ძლიერდება. ამის დასტურია ის არაერთი ხარისხის დამადასტურებელი საერთაშორისო სერტიფიკატი და საექსპორტო ტრანზაქცია, რომელსაც „საქკაბელი“ უკვე 3 კონტინენტის მასშტაბით ახორციელებს. დღეს საწარმოში ჩვენს ჩეხ პარტნიორებს ვუმასპინძლეთ და ურთიერთობების გაღრმავებასა და ევროკავშირის წევრ სხვა ქვეყნებში შესვლის შესაძლებლობებზე ვისაუბრეთ. მოხარული ვართ, რომ ჩვენი საკაბელო პროდუქციით, გვეძლევა შესაძლებლობა, მსოფლიოს მასშტაბით დავუჭიროთ მხარი სხვადასხვა მასშტაბის პროექტებს“, – „საქკაბელის“ მმართველი დირექტორი, დავით კაპანაძე.
„ჩვენი და „საქკაბელის“ თანამშრომლობის ისტორია 2024 წელს იწყება, როდესაც მათ ჩეხეთში გამართულ გამოფენაზე შევხვდით. პარტნიორობის დაწყებისთანავე ნათელი იყო, რომ კომპანიის მაღალი სტანდარტებიდან გამომდინარე, პროდუქცია მაღალ კონკურენტუნარიანი იქნებოდა ცენტრალური ევროპის ბაზარზე. ჩვენი თანამშრომლობის პირველი ნახევარი წელი ძალიან ნაყოფიერი აღმოჩნდა. დღეს კი, როდესაც ჩვენი მეორე ვიზიტის ფარგლებში კიდევ ერთხელ გავეცანით ადგილზე წარმოების პროცესს, ჩვენზე დიდი შთაბეჭდილება მოახდინა „საქკაბელის“ მიერ, ბოლო რამდენიმე თვის განმავლობაში წინ გადადგმულმა ნაბიჯებმა, როგორც წარმოების მოცულობის ზრდის, ასევე კომპანიის მოქნილობის კუთხით. მეორე საექსპორტო ტრანზაქციის ფარგლებში ABC კაბელი უკვე წარმატებით გაიგზავნა ჩეხეთში, ხოლო ჩვენი შემდეგი ნაბიჯი ითვალისწინებს ჩეხეთის მეზობელ ბაზრებზე შესვლას, როგორიცაა სლოვაკეთი, უნგრეთი, გერმანია და ავსტრია. დარწმუნებული ვარ, ჩვენი თანამშრომლობა წარმატებით გაგრძელდება“ – MD Trade & Consulting s.r.o.-ის თანადამფუძნებელი, მიხალ დიტრიხი.
ინფორმაციისთვის: „საქკაბელი“ საკუთარი პროდუქციის ექსპორტს 2010 წლიდან ეწევა. 2023 წლიდან, „საქკაბელის“ პროდუქცია ევროკავშირის ბაზარზე, ხოლო 2024 წლიდან, ახლო აღმოსავლეთის რეგიონში გამოჩნდა. „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს როგორც საკაბელო, ისე ელექტრიფიკაციასთან დაკავშირებულ სხვა 2000-მდე დასახელების პროდუქტს სთავაზობს. კომპანიის ერთ-ერთი პრიორიტეტული მიმართულება საექსპორტო ბაზრების დივერსიფიცირება და ქართულ ეკონომიკაში იმპორტის ჩანაცვლებაა.