„საქკაბელის“ საწარმოში ევროკავშირის მიერ დაფინანსებული Horizon Europe-ის პროექტის, MaDiTraCe-ის ფარგლებში, მინერალური ნედლეულის უნივერსალური სერტიფიცირების სისტემის, CERA 4in1-ის საპილოტე პროგრამა განხორციელდა. საპილოტე აუდიტი DMT ჯგუფმა განახორციელა, რომლის ფარგლებშიც „საქკაბელის“ საწარმოსა და სათავო ოფისში სამუშაო ვიზიტები და სხვადასხვა დეპარტამენტის წარმომადგენლებთან ინტერვიუები შედგა; შეფასდა „საქკაბელის“ საოპერაციო, სოციალური, გარემოსდაცვითი და მმართველობითი მიდგომები.
CERA 4in1-ის ფარგლებში, შესრულების სტანდარტი (CPS) მწარმოებლებისთვის ESG (გარემოსდაცვითი, სოციალური და კორპორაციული მმართველობის) მოთხოვნებს განსაზღვრავს. ხოლო მიწოდების ჯაჭვის სტანდარტი (CCS) სავაჭრო საქონელზე (საბადოდან მოპოვებულ ნედლეულზე, კონცენტრატებზე, პირველად და მეორად ნედლეულზე) ვრცელდება და განსაზღვრავს მართვის შესაბამისობის კრიტერიუმებს პასუხისმგებლიანად მოპოვებული მინერალების მიკვლევადობისთვის, საქონლის სპეციფიკური აღრიცხვის მეთოდებისა და მიწოდების ჯაჭვისთვის.
„EU Horizon MaDiTraCe-ის მიერ დაფინანსებულ საპილოტე პროგრამაში „საქკაბელის“ მონაწილეობა კიდევ ერთხელ ადასტურებს ჩვენს ამბიციას, ვიყოთ სანდო და პასუხისმგებლიანი პარტნიორი ჩვენი კონტრაქტორების, მომხმარებლისა და ყველა იმ დაინტერესებული მხარისთვის, რომელიც მაღალი სტანდარტის პროდუქციას, ოპერაციებსა და სოციალურ პასუხისმგებლობას ელის. რეგულაციური და საბაზრო მოთხოვნები სულ უფრო მეტად ორიენტირებულია ESG მაჩვენებლებსა და მიკვლევადობაზე; CPS და CCS სტანდარტები კი, კომპანიებისთვის ერთგვარი შესაძლებლობაა იმის გამოსავლენად, რომ ისინი არა მხოლოდ კანონმდებლობის შესაბამისად ოპერირებენ, არამედ პასუხისმგებლიანი და ეთიკური წარმოების საუკეთესო პრაქტიკასაც იზიარებენ. საპილოტე პროგრამაში მონაწილეობით, ჩვენ ვაძლიერებთ გამჭვირვალობას და ვამყარებთ ჩვენს სანდოობას. მოხარული ვართ, რომ გვქონდა შესაძლებლობა, მონაწილეობა მიგვეღო DMT-ის საპილოტე პროგრამაში. აუდიტის ფარგლებში გაგვიზიარდა ღირებული გამოცდილება და უკუკავშირი, რომელზე დაყრდნობითაც ჩვენ გავაგრძელებთ ოპერაციების გაუმჯობესებას“, – „საქკაბელის“ მმართველი დირექტორი, დავით კაპანაძე.
„საპილოტე პარტნიორები მნიშვნელოვან როლს ასრულებენ CERA 4in1 სტანდარტების რეალურ გარემოში გამოყენებადობის შეფასებაში. CPS და CCS-ის საპილოტე იმპლემენტაციის პროცესში, ჩვენ გვქონდა შესაძლებლობა გვესწავლა, დაგვეხვეწა სახელმძღვანელო პრინციპები და უზრუნველგვეყო, რომ აღნიშნული სტანდარტები ეფექტიანად იქნას გამოყენებული ღირებულების ჯაჭვის სხვადასხვა სეგმენტში. მთელი პროცესის განმავლობაში „საქკაბელის“ ღიაობამ, თანამშრომლობამ და კონსტრუქციულმა ჩართულობამ მოგვცა შესაძლებლობა, საფუძვლიანად შეგვემოწმებინა სტანდარტების განხორციელებადობა და მიგვეღო მნიშვნელოვანი დასკვნები, რომლებიც ხელს შეუწყობს სამომავლო იმპლემენტაციას. გულწრფელ მადლობას ვუხდით „საქკაბელს“ პარტნიორობისთვის, გამჭვირვალობისთვის და პასუხისმგებლიანი მიდგომების დანერგვის მიმართ ერთგულებისთვის,“ – DMT-ის კონსულტანტები, სამუელ ოლმოს ბეტინი და ტანია ნოვაცი.
TÜV NORD CERA 4in1 სერტიფიცირების შესახებ:
https://www.tuev-nord.de/en/services/auditing-and-certification/tuev-nord-cera-4in1-esg-certification/
MaDiTraCe პროექტის შესახებ:
https://www.maditrace.eu/