საქართველოს საკაბელო ინდუსტრიის ლიდერ კომპანია „საქკაბელსა“ და კოლეჯ „სპექტრს“ შორის პროფესიული განათლებისა და დასაქმების ხელშეწყობის მიზნით თანამშრომლობის მემორანდუმი გაფორმდა. შესაბამის დოკუმენტს ხელი „საქკაბელის“ მმართველმა დირექტორმა დავით კაპანაძემ და კოლეჯ „სპექტრის“ დირექტორმა მათე ტაკიძემ მოაწერეს.
პარტნიორობის ფარგლებში „საქკაბელი“ კოლეჯ „სპექტრის“ სტუდენტებს საკუთარ საწარმოში სასწავლო ვიზიტების ფარგლებში გააცნობს საკაბელო პროდუქციის წარმოების პროცესს. აღნიშნული კი მათ შესაძლებლობას მისცემს, რეალურ სამუშაო გარემოში გაეცნონ წარმოების ტექნოლოგიურ ასპექტებს და გაიღრმაონ პრაქტიკული ცოდნა. ამასთან, ელექტროობის მიმართულებით კოლეჯ „სპექტრის“ წარჩინებულ კურსდამთავრებულებს შესაძლებლობა მიეცემათ დასაქმდნენ „საქკაბელში“.
მეორეს მხრივ, „საქკაბელის“ თანამშრომლებს შესაძლებლობა ექნებათ საჭიროებისამებრ აიმაღლონ კვალიფიკაცია და გადამზადდნენ კოლეჯ „სპექტრის“ პროფესიული საგანმანათლებლო პროგრამების ფარგლებში, ისეთი მიმართულებებით, როგორიცაა: ელექტროობა, შედუღება, ელექტრომექანიკური შედუღება და სხვ.
„საქკაბელსა“ და კოლეჯ „სპექტრს“ შორის პარტნიორობა გამოცდილების ორმხრივ გაზიარებას ეფუძნება და ელექტროობის დარგის ხელშეწყობას ისახავს მიზნად. სექტორის მზარდი მოთხოვნებიდან გამომდინარე, ადგილობრივ ბაზარზე კვალიფიციური კადრების არსებობა მით უფრო მნიშვნელოვანი ხდება. მოხარული ვართ, ჩვენს პარტნიორთან ერთად დავუჭიროთ მხარი ელექტროობის დარგში პროფესიული უნარების გაძლიერებას; გვჯერა, თანამშრომლობის ფარგლებში არაერთი ახალგაზრდა იქცევა კვალიფიციურ კადრად და საკუთარი საქმიანობით შეიტანს წვლილს საკაბელო ინდუსტრიის წინსვლასა და ჩვენი ქვეყნის ინფრასტრუქტურულ განვითარებაში“, – „საქკაბელის“ მმართველი დირექტორი, დავით კაპანაძე.
შეგახსენებთ, „საქკაბელი“ ადგილობრივ ბაზარზე სფეროს ლიდერის პოზიციას 67-ე წელია იკავებს და მომხმარებელს როგორც საკაბელო, ისე ელექტრიფიკაციასთან დაკავშირებულ 2000-მდე დასახელების პროდუქტს სთავაზობს. „საქკაბელის“ პროდუქციას მინიჭებული აქვს CE მარკირება, რაც ადასტურებს, რომ პროდუქტი აკმაყოფილებს ევროპის კანონმდებლობას ჯანმრთელობის, უსაფრთხოების და გარემოს დაცვის შესაბამისობის შესახებ და ევროპის ბაზარზე თავისუფალი ვაჭრობის შესაძლებლობას იძლევა. 2023 წლიდან, „საქკაბელის“ პროდუქცია ევროკავშირის წევრ ქვეყნებშიც აქტიურად მოიხმარება. კომპანიის ერთ-ერთ პრიორიტეტს საექსპორტო ბაზრების დივერსიფიცირება და ქართულ ეკონომიკაში იმპორტის ჩანაცვლება წარმოადგენს.
