საქართველოს საკაბელო ინდუსტრიის ლიდერმა კომპანია „საქკაბელმა“ BDO Digital-თან პარტნიორობით საწარმოო რესურსების მართვისა და დაგეგმვის (ERP) სისტემა დანერგა. აღნიშნული „საქკაბელის“ ციფრული ტრანსფორმაციისკენ გადადგმულ მნიშვნელოვან ნაბიჯს წარმოადგენს, რომელიც კომპანიაში ბიზნესპროცესების ოპტიმიზაციასა და ეფექტიანობას უზრუნველყოფს.
„საქკაბელისა“ და BDO Digital-ის გუნდების აქტიური თანამშრომლობით, ERP სისტემის დანერგვა უპრეცედენტოდ მოკლე დროში, 3 თვეში განხორციელდა. დანერგვის პროცესი ისეთ ეტაპებს მოიცავდა, როგორიცაა: მონაცემების მომზადება და მიგრაცია, პროცესების ანალიზი და ადაპტაცია, სისტემის კონფიგურაცია და სხვ.
ERP სისტემის დანერგვის შედეგად, “საქკაბელის“ ბიზნესპროცესების ცენტრალიზებულ სისტემასთან ინტეგრაცია განხორციელდა, რამაც შესაძლებელი გახადა გაყიდვებთან, მარაგების მართვასა და ფინანსურ ინტერაქციებთან დაკავშირებული ოპერაციების ერთიანი, უნივერსალური სოფტიდან მართვა.
„თანამედროვე, სწრაფად ცვალებად გარემოში, ინფორმირებული გადაწყვეტილებების მისაღებად უფრო და უფრო თვალსაჩინო ხდება ისეთი პლატფორმების როლი, რომლებიც ბიზნესს სხვადასხვა ტიპის მონაცემებზე წვდომას ერთ სივრცეში სთავაზობს. სწორედ ამიტომ, BDO Digital-თან პარტნიორობით ERP სისტემის დანერგვა გადავწყვიტეთ. თანამშრომლობის ფარგლებში შევიმუშავეთ არქიტექტურული გადაწყვეტები, რომელმაც ჩვენს გუნდს რეალურ დროში მისცა წვდომა სხვადასხვა მონაცემსა თუ ანალიტიკურ ინსტრუმენტზე. შედეგად კი, მნიშვნელოვნად დაიზოგა თანამშრომელთა დროითი რესურსი და გამარტივდა მონაცემებზე დაფუძნებული გადაწყვეტილებების მიღება. როგორც საქართველოს საკაბელო ინდუსტრიის ლიდერი კომპანია, „საქკაბელი“ განაგრძობს საკუთარი პროდუქციისა და ბიზნესპროცესების მუდმივ განვითარებაზე ზრუნვას. ERP სისტემის დანერგვა „საქკაბელის“ ციფრული ტრანსფორმაციის გზაზე გადადგმული მნიშვნელოვანი ნაბიჯია, რომელიც ბიზნესის მდგრადობასა და პროცესების უწყვეტობას განაპირობებს“, – „საქკაბელის“ მმართველი დირექტორი, დავით კაპანაძე.
ინფორმაციისათვის: 1958 წლიდან, “საქკაბელი“ მომხმარებელს 2000-მდე დასახელების საკაბელო და ელექტრიფიკაციასთან დაკავშირებულ პროდუქტს სთავაზობს. კომპანია ქვეყნის მასშტაბით რვა შოურუმს, სამ სასაწყობე სივრცეს, სადილერო და სადისტრიბუციო ქსელებს აერთიანებს. “საქკაბელის” პროდუქცია, მომხმარებელთან გაგზავნამდე, დეტალურ შემოწმებას ქარხანაში მოქმედ, ხარისხის კონტროლის აკრედიტებულ ლაბორატორიაში გადის. 2023 წლიდან, „საქკაბელის“ პროდუქცია ევროკავშირის წევრ ქვეყნებშიც აქტიურად მოიხმარება.
