„საქკაბელის“ პროდუქციას ევროპაში ერთ-ერთი ყველაზე ავტორიტეტული ელექტროტექნიკური პროდუქტების მასერტიფიცირებელი ორგანოს მიერ ხარისხის სერტიფიკატები მიენიჭა. ჩეხეთის „ელექტროტექნიკური ტესტირების ინსტიტუტმა“ (EZÚ) ხარისხის დამადასტურებელი საერთაშორისო სერტიფიკატები „საქკაბელის“ მიერ წარმოებულ ცეცხლმედეგ, ჰალოგენისგან თავისუფალ პროდუქციაზე გასცა.
ორთვიანი ინტენსიური ტესტირების შედეგად დადასტურდა, რომ „საქკაბელის“ მიერ წარმოებული NA2XH დასახელების კაბელი აკმაყოფილებს საერთაშორისო IEC 60502-1:2022 სტანდარტს. EZÚ-ს მაღალტექნოლოგიურ ლაბორატორიაში კაბელის ისეთი კრიტერიუმები შეფასდა, როგორიცაა: საიზოლაციო მასალების ელექტრული და მექანიკური თვისებები, გამტარის წინაღობა, ძაბვაზე მდგრადობა, გამოყოფილი კვამლის სიმკვრივე და სხვ. გარდა ამისა, ჩატარდა ჰალოგენების არშემცველობის, წვისას გამოყოფილი აირებისა და ვერტიკალური ცეცხლის გავრცელების ტესტები, რამაც ცხადყო პროდუქციის პარამეტრების სრული თანხვედრა საერთაშორისო სტანდარტთან.
აღსანიშნავია, რომ “საქკაბელის“ წარმოების N2XH ტიპის კაბელმა წარმატებით გაიარა ევროკავშირის სამშენებლო პროდუქტების რეგულაციასთან (CPR) შესაბამისობის ტესტი. EZÚ-ს ლაბორატორიამ დაადასტურა, რომ პროდუქტი უსაფრთხო და სანდოა, რაც მის მოხმარებას შესაძლებელს ხდის ევროკავშირის მასშტაბით.
„გვეამაყება, რომ ჩვენმა პროდუქციამ მორიგი საერთაშორისო აღიარება მოიპოვა, რაც კიდევ ერთხელ ადასტურებს „საქკაბელის“ ერთგულებას უმაღლესი ხარისხისა და საერთაშორისო სტანდარტების მიმართ. მოგეხსენებათ, ჩვენს საწარმოში უკვე რამდენიმე წელია ოპერირებს ხარისხის კონტროლის აკრედიტებული ლაბორატორია, სადაც თითოეული პროდუქტი რეალიზაციამდე დეტალურ შემოწმებას გადის. EZÚ-ს მიერ მონიჭებული სერტიფიკატები კიდევ უფრო აძლიერებს ჩვენს პოზიციას საერთაშორისო ასპარეზზე და ხელს უწყობს „საქკაბელის“, როგორც გლობალურ ბაზარზე მოწინავე მოთამაშის პოზიციონირებას. მოხარული ვართ, რომ გვეძლევა შესაძლებლობა ჩვენი პროდუქციით მხარი დავუჭიროთ მცირე თუ მასშტაბურ პროექტებს როგორც საქართველოში, ასევე საქართველოს ფარგლებს გარეთ,“ –„საქკაბელის“ მმართველი დირექტორი, დავით კაპანაძე.
ინფორმაციისთვის: NA2XH და N2XH ხანძარმედეგი, ჰალოგენისგან თავისუფალი კაბელებია, რომლებიც ფართოდ გამოიყენება ხალხმრავალ და ინდუსტრიულ პროექტებში, კერძოდ: სასტუმროებში, სკოლებში, საწარმოებში და ა.შ. პროდუქტებს კვამლის წარმოქმნის განსაკუთრებულად დაბალი კოეფიციენტი გამოარჩევთ, რაც ხანძრის შემთხვევაში მნიშვნელოვნად ამცირებს ფატალური შემთხვევების რისკს.
შეგახსენებთ, „საქკაბელი“ 67-ე წელია იკავებს ადგილობრივ ბაზარზე სფეროს ლიდერის პოზიციას და მომხმარებელს, როგორც საკაბელო, ისე ელექტრიფიკაციასთან დაკავშირებულ სხვა 2000-მდე დასახელების პროდუქტს სთავაზობს. კომპანიის ერთ-ერთი პრიორიტეტული მიმართულება ქართულ ეკონომიკაში იმპორტის ჩანაცვლება და საექსპორტო ბაზრების დივერსიფიცირებაა.
