საქართველოს საკაბელო ინდუსტრიის ლიდერი კომპანია, „საქკაბელი“ „საქართველოს მზის ენერგიის ასოციაციასთან“ (GSEA) პარტნიორობას აძლიერებს. თანამშრომლობის ფარგლებში „საქკაბელი“ მაღალი ხარისხის საკაბელო გადაწყვეტებით კიდევ უფრო აქტიურად შეუწყობს ხელს საქართველოში მზის ენერგიის სექტორის განვითარებას და მდგრადი მომავლის შექმნას.
GSEA-ს მთავარ მიზანს საზოგადოების ინფორმირებულობის გაზრდითა და კერძო და საჯარო ინსტიტუტებთან აქტიური თანამშრომლობით, მზის ენერგეტიკის და მასთან დაკავშირებული ტექნოლოგიების განვითარების ხელშეწყობა წარმოადგენს.
„მზის ენერგიის მხარდაჭერა უკვე რამდენიმე წელია, “საქკაბელისთვის“ ერთ-ერთ პრიორიტეტულ მიმართულებას წარმოადგენს, რომლის ფარგლებშიც წარმატებით ვთანამშრომლობთ EPC კომპანიებთან და ინდუსტრიის წარმომადგენლებთან. მოხარული ვართ, რომ GSEA-სთან პარტნიორობით გვეძლევა შესაძლებლობა, კიდევ უფრო აქტიურად შევუწყოთ ხელი საქართველოში მზის ენერგიის ინფრასტრუქტურის განვითარებას. ჩვენი მიზანი კი უცვლელია – მაღალი ხარისხის საკაბელო გადაწყვეტებით, მხარი დავუჭიროთ პროექტებს, რომელიც სარგებლის მომტანი იქნება როგორც გარემოსთვის, ისე საქართველოს ენერგეტიკული მომავლისთვის”, – აცხადებენ „საქკაბელში“.
“ასოციაციაში ისეთი ძლიერი კომპანიების გაწევრიანება, როგორიცაა „საქკაბელი“, განსაკუთრებით მნიშვნელოვანია, რადგან ისინი ხელს უწყობენ სფეროში მაღალი ხარისხის სტანდარტების დამკვიდრებას, სანდო პროფესიული ქსელის განვითარებას და ჯანსაღი კონკურენციის შექმნას. მნიშვნელოვანი მოთამაშეები ერთიანდებიან საერთო მიზნისთვის – უზრუნველყონ მზის ენერგიის სექტორის სწრაფი, გამჭვირვალე და მდგრადი განვითარება საქართველოში. ასეთი წევრები ასოციაციას აძლიერებს როგორც პროფესიულ, ასევე რეპუტაციულ დონეზე, რაც საბოლოოდ მთლიან სექტორს და საზოგადოებას სძენს მეტ სარგებელს“, – აცხადებენ „საქართველოს მზის ენერგიის ასოციაციაში“.
ინფორმაციისთვის: „საქკაბელი“ 2023 წლიდან აწარმოებს H1Z2Z2-K სოლარ კაბელებს, რომელიც სხვადასხვა ტიპის – საცხოვრებელი, კომერციული თუ ინდუსტრიული – მზის ენერგიის პროექტებში გამოიყენება. პროდუქცია EN 50618:2014 და IEC 62930:2017 სტანდარტებთან შესაბამისობით მზადდება და საერთაშორისო მასერტიფიცირებელი ორგანო TÜV Nord-ისა და ჩეხეთის „ელექტროტექნიკური ტესტირების ინსტიტუტის“ უსაფრთხოებისა და ხარისხის დამადასტურებელ სერტიფიკატებს ფლობს.
2022 წელს, ქ. ზესტაფონში, „საქკაბელის“ საწარმოში შემავალი შენობების სახურავებზე 500 კვტ დადგმული სიმძლავრის მზის ელექტროსადგური მოეწყო, რომლის გენერაციაც საწარმოო პროცესს ხმარდება.